اسلام آباد: پاکستان اور اردن کے درمیان سیاسی مشاورت کا دوسرا دور 10 اپریل کو اردن کے دارالحکومت عمان میں منعقد ہوا۔ دفتر خارجہ کے ترجمان کے مطابق، پاکستانی وفد کی قیادت سیکرٹری خارجہ محترمہ آمنہ بلوچ نے کی۔
اجلاس کے دوران سیکرٹری خارجہ نے مشرق وسطیٰ میں قیام امن کی کوششوں میں اردن کے تعمیری کردار کو سراہا اور فلسطینی پناہ گزینوں کو تحفظ فراہم کرنے کے لیے اردنی حکام کی کاوشوں کی تعریف کی۔
ترجمان کے مطابق آمنہ بلوچ نے غزہ میں جاری اسرائیلی جارحیت کی سخت الفاظ میں مذمت کی اور حکومت پاکستان کی جانب سے فلسطینی عوام کے جائز حقوق کی حمایت اور ان کے لیے کوششیں جاری رکھنے کے عزم کا اعادہ کیا۔
سیاسی مشاورت کے دوران دونوں ممالک کے مابین تجارت، معیشت، اور عوامی روابط کے فروغ پر بھی اتفاق کیا گیا۔ اجلاس میں سیاسی مشاورت کے تیسرے دور کے جلد پاکستان میں انعقاد پر بھی اتفاق کیا گیا۔
DATE . Apr/12/2025
