اسلام آباد:پاکستان اور کرغزستان کے درمیان تجارتی، اقتصادی، سائنسی اور تکنیکی تعاون کے حوالے سے دو روزہ بین الحکومتی کمیشن کا اجلاس اسلام آباد میں منعقد ہوا ،یہ اجلاس دونوں ممالک کے درمیان دوطرفہ تعلقات کو مزید مضبوط کرنے اور مختلف شعبوں میں تعاون بڑھانے کے عزم کی عکاسی کرتا ہے۔
وزارت اقتصادی امور ڈویژن کی طرف سے جاری بیان کے مطابق اجلاس کی مشترکہ صدارت وفاقی وزیر برائے توانائی (پاور ڈویژن) سردار اویس احمد خان لغاری اور کرغز جمہوریہ کے نائب چیئرمین کابینہ برائے وزراء ایدل بیسالوف نے کی۔ دونوں فریقین نے پچھلے اجلاس سے اب تک کی پیش رفت کا تفصیل سے جائزہ لیا اور اقتصادی و تکنیکی تعاون کو مزید مستحکم بنانے پر اتفاق کیا۔
دونوں ممالک نے دوطرفہ تجارت کو فروغ دینے کے عزم کا اعادہ کیا اور تجارتی حجم کو 100 ملین امریکی ڈالر تک لے جانے کا ہدف مقرر کیا۔ برآمدات و درآمدات میں تنوع، پاکستان-کرغزستان جوائنٹ بزنس کونسل کی بحالی، تجارتی میلوں، بزنس فورمز اور بی ٹو بی تبادلوں کے انعقاد پر اتفاق کیا گیا۔ مختلف اہم شعبوں میں تعاون کو بڑھانے کے لیے کئی مفاہمتی یادداشتوں پر دستخط کیے گئے۔
معیارات و کوالٹی کے شعبے میں، پاکستان کے ادارہ برائے معیار و کنٹرول اور کرغز وزارت معیشت و تجارت کے مرکز برائے معیارات و پیمائش کے درمیان مفاہمت کی یادداشت پر دستخط ہوئے، جس کا مقصد معیار، میٹرولوجی، منظوری کے نظام اور مینجمنٹ سسٹمز میں تعاون کو فروغ دینا ہے۔
سرمایہ کاری کے شعبے میں، پاکستان کے بورڈ آف انویسٹمنٹ اور کرغز صدر کے تحت نیشنل انویسٹمنٹ ایجنسی کے درمیان سرمایہ کاری کے فروغ پر مبنی مفاہمتی یادداشت پر دستخط کیے گئے۔
علاقائی روابط اور ٹرانسپورٹیشن کے شعبے میں بھی نمایاں پیش رفت ہوئی۔ ڈاک، کارگو، ریل ٹرانسپورٹ اور سول ایوی ایشن میں تعاون کو فروغ دینے پر اتفاق ہوا۔ پاکستان نے کرغز ایئرلائنز کو چارٹر سے باقاعدہ پروازوں کی جانب منتقل ہونے کی تجویز دی۔
کرغزستان کے چین کے ساتھ نئی فضائی راہداری کی تجویز پر پاکستان نے دلچسپی کا اظہار کیا۔ فائبر آپٹک رابطے کے منصوبے میں پاکستان کو شریک کرنے کی کرغز تجویز پر بھی مثبت گفتگو ہوئی۔مالیاتی شعبے میں تعاون کے لیے دونوں ممالک کے مرکزی بینکوں نے اسلامی بینکاری، مالیاتی آلات کی ترقی، اور پاکستان کے نیشنل انسٹی ٹیوٹ آف بینکنگ اینڈ فنانس کے ذریعے تربیتی پروگرامز پر کام کرنے پر اتفاق کیا۔
صحت اور دواسازی کے شعبے میں طبی تعلیم، فارماسیوٹیکل، سرجیکل آلات، اور ویکسین و بائیولوجیکل مصنوعات میں مشترکہ منصوبوں پر بات چیت تیز کرنے پر اتفاق ہوا۔ کرغز حکومت نے پاکستانی دوا ساز کمپنیوں کی رجسٹریشن اور عوامی خریداری میں شمولیت کی حمایت کی پیشکش کی۔
ثقافتی تعاون میں دونوں ممالک نے باہمی تقریبات، کھیلوں کے مقابلوں میں شرکت، سنیما اور نشریاتی اداروں کے درمیان مواد کے تبادلے اور تربیتی پروگرامز پر رضامندی ظاہر کی۔تعلیم اور سائنسی اشتراک کے حوالے سے مشترکہ تربیتی پروگرامز، تعلیمی تبادلے، ادارہ جاتی روابط، اور پاکستان ٹیکنیکل اسسٹنس پروگرام (PTAP) کے تحت کرغز طلبہ کی معاونت پر اتفاق کیا گیا۔ مزدوروں کے تبادلے کے لیے مشترکہ ورکنگ گروپ قائم کرنے پر بھی بات چیت ہوئی۔
اجلاس کے اختتام پر فیصلہ کیا گیا کہ چھٹا اجلاس کرغزستان میں منعقد ہوگا، جس کی تاریخ سفارتی ذرائع سے طے کی جائے گی۔وزارت اقتصادی امور نے اس اجلاس کو وسطی ایشیا، خاص طور پر کرغزستان کے ساتھ پاکستان کی شراکت داری کو مضبوط بنانے اور علاقائی اقتصادی انضمام کو فروغ دینے کے لیے ایک اہم سنگِ میل قرار دیا ہے۔ طے پانے والے اقدامات دونوں ممالک کی پائیدار ترقی، مشترکہ خوشحالی اور عوامی روابط کو فروغ دیں گے۔
DATE . July/29/2025
