اسلام آباد — ترجمان دفتر خارجہ شفقت علی خان نے کہا ہے کہ پاکستان سلطنت عمان میں اسلامی جمہوریہ ایران اور امریکہ کے درمیان ہونے والے مذاکرات کا خیرمقدم کرتا ہے۔ یہ مذاکرات 12 اپریل کو مسقط میں عمان کی سہولت کاری کے تحت منعقد کیے گئے۔
دفتر خارجہ کے ترجمان نے کہا کہ پاکستان سمجھتا ہے کہ مذاکرات اور سفارت کاری ہی خطے میں پائیدار امن، استحکام اور اختلافات کو بات چیت اور باہمی احترام کی بنیاد پر حل کرنے کا بہترین ذریعہ ہیں۔
انہوں نے مزید کہا کہ پاکستان ہمیشہ سے فریقین کو بات چیت اور سفارتی ذرائع اپنانے کی ترغیب دیتا رہا ہے، اور اسی پالیسی کے تحت موجودہ پیشرفت کو مثبت قدم تصور کرتا ہے۔
ترجمان نے سلطنت عمان کے تعمیری اور قابلِ قدر کردار کو سراہتے ہوئے کہا کہ عمان کی جانب سے سہولت کاری اور میزبانی خطے میں امن کے قیام کی کوششوں میں اہم سنگِ میل ہے۔
DATE . Apr/14/2025
