اسلام آباد:وزیرِ اعظم محمد شہباز شریف سے کینیڈا کے پاکستان میں تعینات ہونے والے ہائی کمشنر طارق علی خان نے ملاقات کی ہے۔ وزیراعظم نے کینیڈین ہائی کمشنر کو تقرری پر مبارکباد پیش کرتے ہوئے کہا کہ ان کی تعیناتی کے دوران پاکستان اور کینیڈا کے درمیان دیرینہ اور دوستانہ تعلقات مزید مستحکم ہوں گے۔
وزیراعظم نے کہا کہ پاکستان کینیڈا کے ساتھ تعلقات کی مزید مضبوطی کا خواہاں ہے۔ پاکستان میں کان کنی اور معدنیات کے شعبے میں سرمایہ کاری کے وسیع مواقع موجود ہیں۔ریکوڈک منصوبے کا ذکر کرتے ہوئے وزیرِ اعظم محمد شہباز شریف نے کہا کہ بیرک گولڈ پاکستان کے کان کنی کے شعبے میں ترقی کی راہ ہموار کرنے کے ساتھ ساتھ پاکستان اور کینیڈا اقتصادی تعاون کی کامیابی کی سند ثابت ہوگا۔
کینیڈین ہائی کمشنر نے وزیراعظم کا شکریہ ادا کیا اور پاکستان اور کینیڈا کے دوطرفہ تعلقات بالخصوص زراعت، توانائی، تجارت، سرمایہ کاری، ٹیکنالوجی، تعلیم اور عوامی تبادلوں کو مزید فروغ دینے کے لیے کام کرنے کے عزم کا اظہار کیا۔
DATE . Nov/13/2025
