لاہور:پنجاب میں جنگلات اور ماحولیات کے نظام کو کرپشن فری بنانے کے لیے وزیراعلیٰ مریم نواز شریف نے ایک بڑا قدم اٹھا لیا ہے۔ 10 سال بعد انگریز دور کے بنائے گئے فارسٹ ایکٹ میں تبدیلی کر دی گئی ہے۔
ماحول کے تحفظ کے ادارے (ای پی اے) میں کاغذی کارروائی کا سو فیصد خاتمہ کر دیا گیا ہے، جس کے بعد جدید ٹیکنالوجی سے لیس ڈیجیٹل نظام کے ذریعے تمام امور انجام دیے جائیں گے۔ اس اقدام کے ساتھ ای پی اے پنجاب کا پہلا سرکاری محکمہ بن گیا ہے جو مکمل طور پر ڈیجیٹل نظام پر منتقل ہو گیا ہے۔
اب ہر دستاویز پر مخصوص حوالہ نمبر اور کیو آر کوڈ موجود ہوگا، جس کی سیکنڈز میں تصدیق ممکن ہوگی۔ ہر فیصلے کی پڑتال کی جا سکے گی جبکہ فیصلوں کی وجوہات، سفارشات اور منظوری سمیت تمام تفصیلات کا ڈیجیٹل ریکارڈ کم وقت میں دستیاب ہوگا۔
حکومت پنجاب کے حکم کے مطابق ماحولیات سے متعلق تمام محکمے جدید ڈیجیٹل نظام کے بغیر نہ کوئی حکم جاری کریں گے اور نہ ہی کوئی منظوری دیں گے۔ ڈیجیٹل نظام E-FOAS کے علاوہ کسی ذریعے سے حکم جاری کرنے، منظوری دینے یا انتظامی فیصلہ کرنے والے افسران اور عملے کے خلاف سخت تادیبی کارروائی ہوگی۔ اس حوالے سے ماحولیاتی تحفظ کے ادارے کے ڈائریکٹر جنرل ڈاکٹر عمران حامد شیخ نے باضابطہ حکم نامہ جاری کر دیا ہے۔
امپورٹ لائسنس، لیبارٹری سرٹیفکیشن، پروٹیکشن آرڈرز اور سرکاری سفارشات کا اجرا بھی صرف E-FOAS ڈیجیٹل نظام کے ذریعے ہوگا۔ حکومت پنجاب کے نوٹیفکیشن کے مطابق ڈیجیٹل نظام سے ہٹ کر جاری ہونے والا کوئی حکم، تصدیق یا منظوری قانونی اور درست تصور نہیں ہوگی۔
وزیراعلیٰ مریم نواز شریف کا کہنا ہے کہ انسانی مداخلت کے خاتمے سے جعلسازی اور غیرقانونی اجازت ناموں کا بھی خاتمہ ہوگا۔ انہوں نے ماحول کے تحفظ کے ساتھ ساتھ کرپشن کے خاتمے کو یقینی بنانے پر اپنی ٹیم کو شاباش دی اور کہا کہ الحمدللہ، پنجاب میں شفاف نظام کی جانب ایک اور اہم قدم اٹھا لیا گیا ہے-
DATE . Dec/22/2025
