لاہور: وزیراعلیٰ پنجاب مریم نواز شریف نے ایک بڑا سنگ میل عبور کرتے ہوئے صرف تین ماہ کے قلیل عرصے میں ایک لاکھ سات ہزار سے زائد افراد کو 61 ارب روپے کے قرضے جاری کر کے تاریخ رقم کر دی ہے۔
پنجاب میں پہلی مرتبہ صرف 90 دنوں میں 57 ہزار 913 نئے کاروبار شروع ہونے کا ریکارڈ قائم ہوا ہے۔ ان نئے کاروباروں کے آغاز کے لیے 23 ارب 91 کروڑ روپے کے قرضے جاری کیے گئے ہیں۔ ایک اور اہم پیش رفت یہ ہے کہ پہلی مرتبہ 6 ہزار 753 خواتین نے اپنے کاروبار چلانے کے لیے 3 ارب 42 کروڑ روپے کے قرضے حاصل کیے ہیں۔
وزیراعلیٰ مریم نواز شریف نے آسان کاروبار فنانس اور کار لون کے لیے زیر غور درخواستوں کے پراسیس کو جلد مکمل کرنے کا حکم دیا ہے۔ ان کی ہدایت پر آسان کاروبار کارڈ اب واٹس ایپ کے ذریعے بھی ایکٹیو کیا جا سکے گا۔ انہوں نے ایکسپورٹ اور مینو فیکچرنگ سیکٹر لون کے لیے ایک جامع پلان بھی طلب کر لیا ہے۔
وزیراعلیٰ مریم نواز شریف نے واضح طور پر کہا ہے کہ آسان کاروبار فنانس اور آسان کاروبار کارڈ پروگرام کسی صورت نہیں رکنا چاہیے۔ انہوں نے یہ ہدایات آسان کاروبار فنانس اور آسان کاروبار کارڈ سے متعلق ایک خصوصی اجلاس کی صدارت کرتے ہوئے جاری کیں۔
اجلاس میں ایم ڈی پی ایس آئی سی سارہ عمر نے آسان کاروبار سکیم پر اب تک کی پیش رفت سے آگاہ کیا۔ چیف منسٹر آسان کاروبار فنانس سکیم کے تحت اب تک 3 ہزار 10 افراد کو 18 ارب روپے کے قرضے جاری کیے جا چکے ہیں، جبکہ چیف منسٹر آسان کاروبار کارڈ سکیم کے تحت ایک لاکھ چار ہزار افراد کو 43 ارب روپے کے قرضے جاری کیے گئے ہیں۔
چیف منسٹر آسان کاروبار فنانس کے لیے موصول ہونے والی 74 ہزار 579 درخواستوں میں سے 2 ہزار 505 منظور ہو کر قرضے جاری کیے جا چکے ہیں۔ چیف منسٹر آسان کاروبار فنانس ٹیرٹو کے لیے موصول ہونے والی 12 ہزار 29 درخواستوں میں سے 505 منظور ہوئیں اور قرضے جاری کیے گئے۔ چیف منسٹر آسان کاروبار کارڈ سکیم کے لیے 13 لاکھ 8 ہزار 38 درخواستیں موصول ہوئیں جن میں سے 1 لاکھ 4 ہزار 133 منظور کی گئیں۔
ٹرانسپورٹیشن کے کاروبار کے لیے 1 ہزار 312 افراد نے 3 ارب 91 کروڑ روپے کے قرضے حاصل کیے، جبکہ ٹریڈنگ اینڈ ڈسٹری بیوشن کے لیے 175 افراد نے 3 ارب 94 کروڑ روپے کے قرضے حاصل کیے۔ پروفیشن سروسز، ایگری کلچر، ڈیری، فوڈ، بیوٹیشن، آٹو، فرٹیلائزر، پیسٹی سائیڈ اور دیگر کاروبار کے لیے بھی قرضے حاصل کرنے کا رجحان دیکھا گیا۔ آسان کاروبار کارڈ کے ذریعے سروسز مہیا کرنے والے سب سے زیادہ 61 ہزار 996 افراد نے 26 ارب 13 کروڑ روپے کے قرضے حاصل کیے، ٹریڈنگ کے لیے 24 ہزار 522 افراد نے 10 ارب 75 کروڑ روپے کے قرضے حاصل کیے اور ایگری سمال بزنس کے لیے 10 ہزار 699 افراد نے 3 ارب 69 کروڑ روپے کے قرضے حاصل کیے۔
DATE . May/17/2025
