لاہور-پنجاب حکومت نے صوبے کے مختلف شہروں میں 1500الیکٹرک بسیں چلانے کا فیصلہ کیاہے،وزیراعلیٰ مریم نوازشریف کی زیرِ صدارت ٹرانسپورٹ ڈیپارٹمنٹ کے خصوصی اجلاس میں منصوبے کی اصولی منظوری دی گئی ہے۔
وزیر اعلیٰ نے اجلاس سے خطاب کرتے ہوئے کہا کہ ترقی کے سفر میں سب کو شریک کرنے کے لئے مختلف شہروں میں الیکٹرک بس چلائی جائیں گی، انہوں نے کہاکہ وہ سب کی وزیر اعلیٰ ہیں اور چاہتی ہیں کہ پنجاب کے ہر بڑے شہر میں شاندار اور جدید ترین بس سسٹم موجود ہو۔ پہلے مرحلے میں لاہور اور گوجرانوالہ میں الیکٹرک بسیں چلائی جائیں گی جس کے لئے وزیراعلیٰ نے 380الیکٹرک بسوں کی خریداری کا عمل جلد از جلد مکمل کرنے کی ہدایت کی ہے۔
اجلاس میں سرگودھا،شیخوپورہ، سیالکوٹ، گجرات، رحیم یار خان اور ڈی جی خان میں ننیاٹرانسپورٹ سسٹم متعارف کرانے کا فیصلہ کیا گیا،اس کے علاو ہ فیصل آباد میں اورنج اور ریڈ بس سروس شروع پر بھی اتفاق کیا گیا ، سمندری روڈ تا سرگودھا روڈ ریڈ بس سروس اور جڑانوالہ تا جھنگ روڈ اورنج بس سروس شروع کی جائے گی۔
وزیر اعلیٰ مریم نواز نے لاہور، گوجرانوالہ الیکٹرک بس سروس کے لئے اگلے جون تک کی ڈیڈلائن مقرر کر تے ہوئے لاہور میں یلیو لائن الیکٹرک بس کے ٹریک کی پلاننگ کے لئے 15روز کی مہلت دی ہے۔
انہوں نے الیکٹرک بسوں کے چارجنگ سٹیشن قائم کرنے کیلئے پلان بھی طلب کیا ہے اورلاہور میں جدید ترین ٹرانسپورٹ ٹاور کمانڈ اینڈ کنٹرول سنٹر کی منظوری بھی دی۔
DATE . Apr/8/2025
