اسلام آباد: پہلگام فالس فلیگ آپریشن کی ناکامی نے بھارتی فوج کو شدید ہزیمت سے دوچار کر دیا ہے، جس کے نتیجے میں بھارتی ڈیفنس انٹیلی جنس ایجنسی کے ڈائریکٹر جنرل لیفٹیننٹ جنرل ڈی ایس رانا کو عہدے سے برطرف کر دیا گیا ہے۔ ذرائع کے مطابق انہیں سزا کے طور پر اندمان و نکوبار کے سخت فوجی اسٹیشن، المعروف کالا پانی، بھیج دیا گیا ہے۔
ذرائع کے مطابق اس برطرفی کی بڑی وجہ اس خفیہ دستاویز کا لیک ہونا ہے جو پہلگام فالس فلیگ آپریشن سے متعلق تھی اور جسے جنرل رانا کی ذاتی حفاظت میں رکھا گیا تھا۔ یہ دستاویز چند روز قبل منظر عام پر آئی جس نے پورے منصوبے کو بے نقاب کر دیا اور بھارتی حکومت و خفیہ ایجنسی “را” کو دفاعی پوزیشن پر لا کھڑا کیا۔ تحقیقات کے مطابق یہ دستاویز جنرل رانا کے دفتر سے میڈیا تک پہنچی۔
ذرائع کا کہنا ہے کہ ایک کے بعد ایک اعلیٰ عسکری افسران کی برطرفی کا سلسلہ جاری ہے۔ اس سے قبل بھارتی فضائیہ کے ڈپٹی ایئر مارشل سوجیت پوشپاکر دھرکر کو بھی برطرف کیا جا چکا ہے جبکہ لیفٹیننٹ جنرل ایم وی سچندر کمار کو نادرن کمانڈ سے ہٹا کر ان کی جگہ پراتک شرما کو تعینات کیا گیا تھا۔
دفاعی ماہرین کے مطابق جنرل رانا اور دیگر افسران کی برطرفی پہلگام فالس فلیگ آپریشن کی مکمل ناکامی کا اعتراف ہے، جس سے نہ صرف بھارتی فوج کا مورال متاثر ہوا ہے بلکہ افواج کے اندرونی حلقے ذہنی دباؤ کا شکار ہو چکے ہیں۔
DATE . May/3/2025
