وزیراعظم محمد شہباز شریف نے لڑکیوں کی تعلیم کے مسائل کا قابل عمل اور پائیدار حل تلاش کرنے کیلئے اجتماعی کوششیں کرنے کی ضرورت پر زور دیا ہے۔
انہوں نے آج(ہفتہ کو) اسلام آباد میں اسلامی معاشروں میں لڑکیوں کی تعلیم کے مسائل اور مواقع کے موضوع پر دوروزہ بین الاقوامی کانفرنس سے افتتاحی خطاب کرتے ہوئے کہا کہ ان لڑکیوں میں ناصرف خود کو، اپنے خاندانوں کو اور اپنے ملکوں کو ترقی کی راہ پر گامزن کرنے اور غربت سے نکالنے کی صلاحیت ہے بلکہ وہ عالمی معیشت کو بھی مستحکم کر سکتی ہیں۔
انہوں نے کہا کہ ہمیں اپنی مائوں، بہنوں اور بیٹیوں کو یقین دلانا ہو گا کہ ان کے حقوق کا تحفظ ہوگا، مقاصد پورے کئے جائینگے اور ان کے خوابوں کی تعبیر کی راہ میں کوئی ثقافتی رکاوٹ حائل نہیں ہونے دی جائے گی۔
انہوں نے کہا کہ پاکستان سمیت اسلامی دنیا کو لڑکیوں کو تعلیم تک یکساں رسائی یقینی بنانے کیلئے مسائل کا سامنا ہے۔ شہبازشریف نے کہا کہ لڑکیوں کو تعلیم سے محروم کرنا، انہیں روشن مستقبل کے حق سے محروم رکھتے ہوئے ان کی آواز کو دبانے کے مترادف ہے۔
انہوں نے کہا کہ پاکستان میں خواتین کل آبادی کے نصف سے زیادہ ہیں تاہم خواتین کی شرح خواندگی صرف انچاس فیصد ہے۔
انہوں نے کہاکہ دانش سکولوں کا قیام پاکستان میں خواتین کی تعلیم کے حوالے سے عدم مساوات کا مسئلہ حل کرنے کی جانب ایک اہم قدم ہے۔ یہ منفرد اقدام دیہی اور پسماندہ علاقوں کے بچوں کو معیاری تعلیم کی فراہمی کیلئے متعارف کرایا گیا۔
انہوں نے کہااب پاکستان کے دور دراز علاقوں میں بھی اس نوعیت کے اقدام کئے جارہے ہیں جس سے روشن اور پہلے سے زیادہ محفوظ مستقبل کی راہ ہموار ہورہی ہے۔
وزیراعظم نے کہا کہ حکومت نے اپنے اہم یوتھ پروگرام کے لئے معیاری تعلیم فراہم کرنے’ روزگار کے مواقع پیداکرنے اور بامقصد مواقع کی پیشکش کاعزم کررکھا ہے جن میں مصنوعی ذہانت’ اعداد وشمارکا تجزیہ اور سائبر سیکورٹی جیسے جدید دور کے تقاضوں سے ہم آہنگ پیشہ وارانہ ہنر کی تربیت اور وظائف کے علاوہ غیر معمولی کارکردگی کا مظاہرہ کرنے والوں کے لئے لیپ ٹاپس کی فراہمی شامل ہیں۔
وزیراعظم نے کہا کہ ہم نے فیصلہ کیاہے کہ اس کانفرنس میں اقوام متحدہ کی سلامتی کونسل سمیت اقوام متحدہ کے سامنے اعلان اسلام آباد دستخط کے لئے پیش کیا جائے گا جو اُمت کی اجتماعی خواہش بھی ہے۔
وزیراعظم کے خطاب کے بعد بین الاقوامی اشتراک عمل معاہدے پر دستخط ہوئے جو لڑکیوں کی تعلیم کے نصب العین کو آگے بڑھانے کے لئے اجتماعی عزم کی ترجمانی کرتاہے۔
DATE . JAN/12/2025
