راولپنڈی۔14جنوری (اے پی پی):پاکستان کرکٹ بورڈ کے تحت اسٹرائیک فورس کیمپ ہیڈ کوچ عبدالرزاق کی زیر نگرانی شروع ہو گیا۔، پی سی بی کے مطابق کیمپ 30 جنوری تک این سی اے میں جاری رہے گا، اسٹرائیک فورس کیمپس ایمرجنگ اور ایلیٹ کھلاڑیوں کے لیے پورے سال کے لیے پلان کیے گئے ہیں، سابق ٹیسٹ کرکٹر عبدالرزاق کا کہنا ہے کہ اس کیمپ کی سب سے خاص بات یہ ہے کہ کھلاڑیوں کا رسپانس بہت اچھا ہے ، آج چار گھنٹے کا سیشن بہت مفید رہا،
انہوں نے کہا کہ ایکسٹرا کور کے لیے بیٹ کی موومنٹ اور فٹ موومنٹ کیا ہونی چاہیے اور باڈی کا توازن کیا ہونا چاہیے یہ باتیں کھلاڑیوں کو بتائی گئی ہیں، ہیڈ کوچ نے کہا کہ سب سے اہم نکتہ جو بتایا گیا ہے وہ بازو کا مضبوط ہونا ہے ، اس کی مشقیں کرائی جارہی ہیں ، ہفتے بھر کی ٹریننگ کے بعد ان کھلاڑیوں کو میچز میں کھلایا جائے گا جس سے ہمیں پتہ چلے گا کہ ٹی 20 کے اچھے کھلاڑی کون سے ہیں ، انہوں نے کہا کہ یہ کیمپ نارمل کیمپ سے مختلف ہے جس میں پاور ہٹنگ پر توجہ دی جا رہی ہے،
جن ایریاز میں باؤلرز کو وکٹیں ملتی ہیں ، بیٹرز وہاں کھیلنا پسند نہیں کرتے اور وکٹیں گنوا دیتے ہیں ، ہم ان ایریاز پر بھی کام کر رہے ہیں کہ بیٹرز وہاں بھی کامیاب ہو سکیں، عبدالرزاق نے کہا کہ اس کیمپ میں یارکر گیند پر بھی کام کریں گے کہ بیٹر کس طرح اسے امپرووائز کر سکتا ہے۔
