اسلام آباد: وزیراعظم کی زیر صدارت سمندر پار پاکستانیوں کے امور پر ایک خصوصی اجلاس اسلام آباد میں منعقد ہوا۔ اجلاس سے خطاب کرتے ہوئے وزیراعظم نے کہا کہ سمندر پار پاکستانی بیرون ملک پاکستان کے سفیر کا کردار ادا کرتے ہیں اور ان کی خدمات پاکستان کے لیے انتہائی قابلِ قدر ہیں۔وزیراعظم نے کہا کہ حال ہی میں منعقدہ اوورسیز پاکستانی کنونشن میں سمندر پار پاکستانیوں کی بڑی تعداد میں شرکت حکومت کی پالیسیوں پر ان کے اعتماد کا مظہر ہے۔ انہوں نے سمندر پار پاکستانیوں کے صادق جذبے، وطن سے محبت، ایثار اور قربانیوں کو خراجِ تحسین پیش کیا۔شہباز شریف نے کہا کہ سمندر پار پاکستانیوں نے دنیا بھر میں محنت اور دیانت داری سے اپنا اور ملک کا نام روشن کیا ہے۔ انہوں نے طب، تعلیم، انجینئرنگ اور کنسلٹینسی جیسے شعبوں میں بطور پروفیشنل بھرپور محنت کی اور رزقِ حلال کمایا۔وزیراعظم نے بتایا کہ حکومتِ پاکستان نے سمندر پار پاکستانیوں کی خدمات کے اعتراف میں حال ہی میں ایک بڑا پیکج متعارف کرایا ہے۔مزید برآں بیرون ملک مختلف شعبہ جات میں نمایاں کارکردگی دکھانے والے اور اسٹیٹ بینک کے ذریعے سب سے زیادہ سرمایہ پاکستان بھجوانے والے اوورسیز پاکستانیوں کو سول ایوارڈ سے نوازا جائے گا۔وزیراعظم نے کہا کہ حکومت سمندر پار پاکستانیوں کے مسائل کو ترجیحی بنیادوں پر حل کرنے اور انہیں مزید سہولیات فراہم کرنے کے لئے پرعزم ہے۔ ان کے لیے پاکستان میں ان کی مہارت کے مطابق سرمایہ کاری کے مواقع بھی فراہم کیے جائیں گے۔اجلاس میں سمندر پار پاکستانیوں کے لیے اعلان کردہ سہولیات پر پیش رفت اور آئندہ کی حکمت عملی پر بھی بریفنگ دی گئی۔اجلاس میں نائب وزیراعظم و وزیر خارجہ اسحاق ڈار، چیف آف آرمی اسٹاف جنرل عاصم منیر، وفاقی وزراء اور متعلقہ اعلیٰ سرکاری افسران نے شرکت کی۔
Date . Apr/22/2025
