اسلام آباد-وزیراعظم نے رومن کیتھولک چرچ کے پیشوا پوپ فرانسس کی وفات پر گہرے دکھ اور افسوس کا اظہار کیا ہے۔آج جاری کیے گئے ایک بیان میں وزیراعظم نے کہا کہ پاپائے روم اربوں انسانوں کو اچھائی کی ترغیب اور امن و سلامتی کیلئے رہنمائی فراہم کرتے رہے۔آنجہانی پوپ فرانسس بین المذہبی ہم آہنگی، امن، اور انسانیت کے فروغ کے علمبردار تھے۔ان کی قیادت میں کیتھولک چرچ نے دنیا بھر میں محبت، تحمل اور باہمی احترام کے پیغام کو عام کیا۔وزیراعظم نے کہا کہ پوپ فرانسس کا طرزِ عمل نہ صرف مسیحی دنیا کے لیے، بلکہ تمام مذاہب کے پیروکاروں کے لیے مشعلِ راہ رہا۔پوپ فرانسس کا گزشتہ روز ایسٹر کے موقع پر غزہ اور فلسطین میں فوری جنگ بندی اور انسانی حقوق کی پامالی روکنے کا بیان اُنکی پرامن و انسانیت کی محبت سے بھرپور شخصیت کی عکاسی ہے۔وزیراعظم نےکہا کہ پوپ فرانسس کی رحلت پوری دنیا، بالخصوص مسیحی برادری کے لیے ایک ناقابل تلافی نقصان ہے۔میں حکومت پاکستان اور پاکستانی عوام کی طرف سے ویٹی کن سٹی، عالمی مسیحی برادری اور دنیا بھر میں ان کے چاہنے والوں سے دلی ہمدردی اور تعزیت کا اظہار کرتا ہوں
Date . Apr/22/2025
