اسلام آباد – پاکستان کے معاشی منظرنامے پر ایک اور مثبت پیش رفت سامنے آئی ہے، جہاں مارچ 2025 میں 1.2 ارب ڈالر کا شاندار کرنٹ اکاؤنٹ سرپلس ریکارڈ کیا گیا۔ یہ ملکی تاریخ میں کسی ایک مہینے کے دوران حاصل ہونے والا سب سے بڑا کرنٹ اکاؤنٹ سرپلس ہے۔
سٹیٹ بینک آف پاکستان کی جانب سے جاری کردہ اعداد و شمار کے مطابق، رواں مالی سال کے ابتدائی نو مہینوں میں مجموعی کرنٹ اکاؤنٹ سرپلس 1.8 ارب ڈالر تک پہنچ چکا ہے، جو کہ ملکی معیشت کے لیے ایک نہایت خوش آئند اشارہ ہے۔ مارچ کے مہینے میں ترسیلات زر نے بھی ریکارڈ سطح کو چھوتے ہوئے 4 ارب ڈالر سے تجاوز کر لیا ہے۔
برآمدات کے شعبے میں بھی نمایاں بہتری دیکھی گئی، جہاں سالانہ بنیاد پر 8.7 فیصد اضافہ ریکارڈ کیا گیا۔ معاشی ماہرین اس مثبت رجحان کو حکومت کی مؤثر اقتصادی پالیسیوں، بہتر مالی نظم و نسق، اور برآمدات میں اضافے کا نتیجہ قرار دے رہے ہیں۔
DATE . Apr/22/2025
