پاکستان کا شہریوں کی واپسی کے لیے واہگہ بارڈر کھلا رکھنے کا اعلان

اسلام آباد: ترجمان دفتر خارجہ شفقت علی خان نے بھارتی ویزوں کی منسوخی کے بعد پاکستانی شہریوں کو درپیش مشکلات پر تشویش کا اظہار کرتے ہوئے کہا ہے کہ بھارت کی جانب سے پاکستانی شہریوں کے ویزے منسوخ کرنے کا فیصلہ سنگین انسانی مسائل کو جنم دے رہا ہے۔شفقت علی خان کے مطابق کئی پاکستانی مریض اپنا علاج مکمل کیے بغیر وطن واپس آنے پر مجبور ہوئے، جبکہ بعض خاندان جدا ہو گئے ہیں اور بچوں کے والدین سے بچھڑنے کی اطلاعات بھی موصول ہوئی ہیں۔انہوں نے بتایا کہ واہگہ-اٹاری بارڈر سے گزرنے کی آخری تاریخ 30 اپریل مقرر تھی، اور موجودہ صورتحال میں دفتر خارجہ کو بعض پاکستانی شہریوں کے اٹاری پر پھنسنے کی رپورٹس موصول ہوئی ہیں۔ترجمان کا کہنا تھا کہ اگر بھارتی حکام اپنی جانب سے پاکستانی شہریوں کو سرحد عبور کرنے کی اجازت دیتے ہیں تو پاکستان ان کی واپسی کے لیے تیار ہے۔ انہوں نے واضح کیا کہ واہگہ بارڈر آئندہ بھی پاکستانی شہریوں کے لیے کھلا رہے گا۔

Date . May/2/2025