لاہور: گورنر پنجاب سردار سلیم حیدر خان اور گورنر سندھ کامران ٹیسوری نے گورنر ہاؤس لاہور میں ملاقات کی، جس میں بھارت کے حملے کے بعد پیدا ہونے والی صورتحال پر تبادلہ خیال کیا گیا۔
دونوں رہنماؤں نے پاک فوج کو بھارتی جارحیت کا بھرپور جواب دینے پر خراج تحسین پیش کیا۔ گورنر پنجاب سردار سلیم حیدر خان نے کہا کہ ملک کی سالمیت کے لیے تمام سیاسی جماعتیں متحد ہیں اور پوری قوم پاک فوج کے ساتھ سیسہ پلائی دیوار کی طرح کھڑی ہے۔
انہوں نے بھارت کی جانب سے رات کی تاریکی میں نہتے شہریوں کو نشانہ بنانے کی شدید مذمت کی اور کہا کہ بھارتی حملے میں معصوم بچے، خواتین اور مرد شہید ہوئے۔ گورنر پنجاب نے بھارت کو دنیا کا سب سے بڑا دہشت گرد ملک قرار دیا اور کہا کہ بھارتی جارحیت خطے میں امن کے لیے سنگین خطرہ ہے۔
سردار سلیم حیدر خان نے واضح کیا کہ پاکستان خطے میں امن چاہتا ہے لیکن بھارت اسے پاکستان کی کمزوری نہ سمجھے۔ انہوں نے مزید کہا کہ ملک کی حفاظت کے لیے تمام قوم بند مٹھی کی مانند ایک ہے۔
DATE . May/8/2025
