قومی ون ڈے کرکٹ ٹیم کےکپتان اور وکٹ کیپر بیٹر محمد رضوان نے کہا ہے کہ ہم نے اللہ تعالیٰ کے پاک کلام سے یہ سیکھا ہےکہ جنگ نہ کرو لیکن اگر تم پر جنگ مسلط کر دی جائے تو پھر پیچھے نہ ہٹو۔
سوشل میڈیا پر اپنے پیغام میں محمد رضوان نے کہا کہ پاکستان طویل عرصے سے دہشت گردی کا شکار رہا ہے، ہماری نسلیں گولیوں کی تڑتڑاہٹ اور دھماکوں کی گونج سن کر بڑی ہوئی ہیں، اس مٹی میں شہیدوں کا لہو شامل ہے اور یہاں آج بھی ایسے نوجوان زندہ ہیں جو موت سے ویسے ہی محبت کرتے ہیں جیسے کچھ لوگ زندگی سےکرتے ہیں۔
محمد رضوان نے کہا کہ ایسی قوم کو کوئی شکست نہیں دی جا سکتی، ان پر مسلط کی گئی ہر جنگ انہیں مزید جوڑتی ہے، جگاتی ہے اور مضبوط بناتی ہے،یہ پیغام ان سب کے لیے ہے جو سمجھنےکی صلاحیت رکھتے ہیں۔ ہم نے حوصلہ رکھنا ہے، یقین رکھنا ہے، نہ ظلم کرنا ہے نہ ظلم سہنا ہے۔
DATE . May/9/2025
