اسلام آباد :آپریشن “بنیان مرصوص” میں بھارتی جارحیت کا تاریخی اور منہ توڑ جواب دینے پر ملک بھر میں جشن کا سماں ہے۔ عوام جوق در جوق سڑکوں پر نکل آئے اور افواج پاکستان کو شاندار خراج تحسین پیش کرنے کے لیے ریلیاں نکالیں۔ملک کے ہر شہر اور گلی میں افواج پاکستان کے ساتھ اظہار یکجہتی کے لیے نکالی گئی ریلیوں میں عوام کی کثیر تعداد نے شرکت کی۔ لوگوں نے اپنے بہادر جوانوں پر پھولوں کی پتیاں نچھاور کیں اور انہیں پھولوں کے ہار پہنائے۔لکی مروت میں فتح کی خوشی میں عوام کی ایک بڑی تعداد نے قومی پرچم اٹھا کر “پاک فوج زندہ باد” کے فلک شگاف نعرے بلند کیے۔ شمالی وزیرستان اور باجوڑ میں بھی بھارتی جارحیت اور افواج پاکستان کی فتح پر شاندار ریلیاں منعقد کی گئیں۔ چترال کے غیور عوام بھی افواج پاکستان کو خراج تحسین پیش کرنے کے لیے سڑکوں پر نکل آئے۔پشاور کینٹ اور مردان میں بھی عوام کی بڑی تعداد بھارت کے خلاف فتح کا جشن منانے کے لیے سڑکوں پر امڈ آئی۔ ڈیرہ اسماعیل خان اور ٹانک کے شہریوں نے بھی “پاک فوج زندہ باد، بھارت مردہ باد” کے نعرے لگاتے ہوئے اپنی مسلح افواج سے والہانہ محبت کا اظہار کیا۔ سوات میں بھی عوام کی ایک بڑی تعداد نے اپنی بہادر مسلح افواج کو زبردست خراج تحسین پیش کیا۔مہمند، نوشہرہ اور قلعہ بالا حصار میں بھی عوام نے فتح کی خوشی میں شاندار ریلیوں کا انعقاد کیا۔ ان ریلیوں میں ہر مکتبہ فکر کے افراد نے بھرپور شرکت کی اور اس دوران عوام نے ایک دوسرے میں مٹھائیاں بھی تقسیم کیں۔ریلیوں کے شرکاء نے اس شاندار فتح پر اللہ تعالیٰ کی ذات کا شکر ادا کیا اور اپنی بہادر افواج کے حق میں پرجوش نعرے بلند کرتے رہے۔
Date . May/12/2025
