اسلام آباد: وزیر اعظم کی زیرِ صدارت ایف بی آر کے ٹیکس کے دائرہ کار بڑھانے اور ٹیکس آمدن میں اضافے پر جائزہ اجلاس منعقد ہوا۔ اجلاس میں وزیر اعظم نے رواں مالی سال میں ایف بی آر کے آمدن کے اہداف کے حصول کی جانب تیزی سے گامزن ہونے پر حکومتی معاشی ٹیم کی کوششوں کو سراہا۔
وزیر اعظم نے ہدایت کی کہ ایسے افراد اور شعبے جو ٹیکس دینے کی استعداد رکھتے ہیں اور ٹیکس نہیں دیتے، انہیں فوری طور پر ٹیکس نیٹ میں لایا جائے۔ انہوں نے ٹیکس چوری کرنے والے افراد اور شعبوں کے خلاف بھرپور کارروائی کرنے اور ٹیکس چوروں کی معاونت کرنے والے افسران اور اہلکاروں کا بھی کڑا احتساب کرنے کا حکم دیا۔
وزیر اعظم نے ٹیکس چوری کی روک تھام کے لیے جدید ٹیکنالوجی کے استعمال پر زور دیتے ہوئے کہا کہ ٹیکس نیٹ میں اضافہ حکومت کی اولین ترجیح ہے اور ٹیکس کی شرح کو کم کرکے عام آدمی پر بوجھ کو کم کرنا چاہتے ہیں۔ انہوں نے سیمنٹ اور دیگر شعبوں میں ڈیجیٹل مانیٹرنگ کو رواں برس جون تک مکمل کرنے اور تمباکو کے شعبے میں ٹیکس آمدن کے حصول کے لیے صوبوں کے ساتھ مل کر اقدامات تیز کرنے کی ہدایت کی۔
وزیر اعظم نے ٹیکس سے متعلق زیر التوا مقدمات کی مؤثر انداز سے پیروی کرکے ملک و قوم کے پیسے کا حصول یقینی بنانے پر زور دیا۔ انہوں نے کہا کہ اللہ کے فضل و کرم سے ملکی معیشت مستحکم اور ترقی کی جانب گامزن ہے اور ملکی ترقی کے لیے سب کو اپنی ذمہ داری نبھانا ہوگی۔
اجلاس کو بتایا گیا کہ ملک بھر میں سیمنٹ پلانٹس میں ٹریک اینڈ ٹریس سسٹم کے مکمل نفاذ سے ٹیکس آمدن میں اربوں روپے کا اضافہ ممکن ہوا۔ چینی کی صنعت میں اس نظام کے نفاذ سے نومبر 2024 سے اپریل 2025 تک ٹیکس آمدن میں 35 فیصد کا اضافہ ہوا۔ اجلاس کو مزید بتایا گیا کہ وزیر اعظم کی قیادت میں ایف بی آر اصلاحات کی بدولت ٹیکس آمدنی کا جی ڈی پی کا 10.6 فیصد کا ہدف حاصل کر لیا جائے گا۔
DATE . May/13/2025
