ماسکو: چیئرمین سینیٹ یوسف رضا گیلانی نے ماسکو کی عظیم مسجد کے نائب مفتی روحجان آبیزوف سے ملاقات کی۔ اس ملاقات میں بین المذاہب ہم آہنگی، رواداری اور مکالمے کے فروغ پر زور دیا گیا۔
ملاقات کے دوران، چیئرمین سینیٹ یوسف رضا گیلانی نے اسلاموفوبیا، انتہاپسندی اور دہشت گردی کے خلاف پاکستان کے پختہ عزم کا اعادہ کیا۔ انہوں نے اس بات پر زور دیا کہ دنیا کو اسلام کے امن و محبت کے پیغام کی طرف لوٹنے کی اشد ضرورت ہے۔ انہوں نے روسی مسلم قیادت کی خدمات کو بھی سراہا۔
دونوں شخصیات نے نوجوانوں کی تعلیم اور علمی تبادلے کے ذریعے مذہبی ہم آہنگی کو فروغ دینے پر اتفاق کیا۔ یہ بات قابل ذکر ہے کہ روس میں 25 ملین سے زائد مسلمان آباد ہیں۔ ملاقات میں پاکستان اور روس کے مذہبی اداروں کے درمیان مشترکہ اقدامات پر بھی زور دیا گیا۔
چیئرمین سینیٹ نے مفتی اعظم روس کو دورہ پاکستان کی دعوت دی، جس کا نائب مفتی نے خیر مقدم کیا۔ اس ملاقات میں روحانی یکجہتی اور باہمی احترام کا اظہار کیا گیا۔ دونوں رہنماؤں نے فرقہ واریت، غلط فہمیوں اور ثقافتی دوریوں کے خاتمے کے لیے مشترکہ کوششوں کی ضرورت پر زور دیا۔
DATE . May/14/2025
