لاہور: وزیراعلیٰ پنجاب مریم نواز شریف نے فادرز ڈے کے موقع پر والد کی قربانیوں، محبت اور بچوں کی تربیت میں ان کے کلیدی کردار کو سراہتے ہوئے ایک خصوصی پیغام جاری کیا۔
اپنے پیغام میں وزیراعلیٰ مریم نواز نے والد کو ایک سائبان سے تشبیہ دی جو خود دھوپ کی شدت برداشت کر کے اپنی اولاد کو سایہ فراہم کرتا ہے۔ انہوں نے کہا کہ باپ وہ ہستی ہے جو اولاد کو نہ صرف جینا سکھاتا ہے بلکہ سر اٹھا کر زندگی گزارنے کا حوصلہ بھی دیتا ہے۔
مریم نواز شریف نے اولاد سے بے پناہ محبت کرنے والے اور ان کے حقوق پورے کرنے والے ہر باپ کو خراج تحسین پیش کیا۔ انہوں نے کہا کہ باپ وہ چراغ ہے جو اولاد کی زندگی کے ہر اندھیرے میں روشنی بنتا ہے۔
اپنے والد اور پاکستان مسلم لیگ (ن) کے قائد محمد نواز شریف کے بارے میں بات کرتے ہوئے، وزیراعلیٰ نے انہیں اپنا رہنما، قائد، استاد اور طاقت قرار دیا۔
انہوں نے مزید کہا کہ محمد نواز شریف کی گود ان کا پہلا مکتب تھا اور ان کا سایہ وہ آسرا ہے جس نے انہیں ہر طوفان میں مضبوط رکھا۔ مریم نواز شریف نے زور دیا کہ محمد نواز شریف کی شخصیت ان کی سیاست اور سوچ کا محور ہے۔
DATE . June/15/2025
