اسلام آباد:وفاقی وزیر داخلہ محسن نقوی سے چین کے سفیر جیان زیڈونگ نے ملاقات کی جس میں پاک چین دوطرفہ تعلقات اور باہمی دلچسپی کے امور پر تبادلۂ خیال کیا گیا۔
چینی سفیر نے اسلام آباد میں حالیہ خودکش حملے کی مذمت کرتے ہوئے قیمتی جانوں کے ضیاع پر گہرے دکھ اور تعزیت کا اظہار کیا۔ چین کی وزارتِ خارجہ کے ترجمان نے بھی اس واقعہ کی مذمت کی ہے۔
ملاقات کے دوران دونوں رہنماؤں نے انسدادِ دہشت گردی اور سیکیورٹی تعاون کو مزید مضبوط بنانے پر اتفاق کیا۔ وفاقی وزیر داخلہ محسن نقوی نے اس بات پر زور دیا کہ پاکستان اور چین کے تعلقات باہمی اعتماد اور احترام پر مبنی ہیں، اور چین پاکستان کا ایک قابلِ اعتماد دوست ہے، جس نے ہر مشکل وقت میں پاکستان کا ساتھ دیا ہے۔
محسن نقوی نے مزید کہا کہ پاکستان دہشتگردی سے سب سے زیادہ متاثر ملک ہے۔ چینی سفیر نے اس موقع پر پاکستان کے ساتھ بھرپور تعاون جاری رکھنے کا عہد کیا۔
DATE . Nov/17/2025
