اسلام آباد:صدرآصف علی زرداری سے آسٹریلیا اور ماریشس کے ہائی کمشنر ز، متحدہ عرب امارات اورڈنمارک کے نامزد سفیروں نے اسلام آباد میں ملاقاتیں کیں اور اپنی اسناد سفارت پیش کیں۔ایوانِ صدر آمد پر غیر ملکی سفارتکاروں کو مسلح افواج کے چاق و چوبند دستے نے گارڈ آف آنر پیش کیا۔
آسٹریلیا کے ہائی کمشنر ٹم کین سے گفتگو کرتے ہوئے صدرآصف علی زرداری نے دونوں ملکوں کے درمیان تجارت، سرمایہ کاری اور تعلیم کے شعبوں میں تعاون بڑھانے پر زور دیا۔ ہائی کمشنرٹم کین کا کہنا تھا کہ آسٹریلیا میں مقیم پاکستانی کمیونٹی دونوں ممالک کے درمیان پل کا کردار ادا کر رہی ہے۔
صدمملکت اور ماریشس کے ہائی کمشنر منصور کریم بخش کی ملاقات میں تجارت، سرمایہ کاری، زراعت، دفاع اور پارلیمانی روابط کے فروغ پر گفتگو ہوئی۔صدرآصف علی زرداری نےکہا کہ ماریشس کے ساتھ دیرینہ دوستانہ تعلقات مشترکہ ورثے اور ثقافتی ہم آہنگی پر مبنی ہیں ۔
اسلام آباد میں ڈنمارک کی سفیر مایا مورٹینسن کی صدر مملکت سے ملاقات میں تجارت، زراعت، ڈیری، ٹیکنالوجی اور انفراسٹرکچر میں تعاون بڑھانے پر بات چیت ہوئی۔صدر مملکت نے ڈنمارک کی پاکستان کے گرین ٹرانزیشن اور موسمیاتی تغیر کے ایجنڈے کی حمایت کو سراہا ۔
صدرآصف علی زرداری سے متحدہ عرب امارات کے سفیر سالم محمد سالم البواب الذابی نے ملاقات کی اور دوطرفہ تعلقات پر تبادلہ خیال کیا۔ صدرمملکت نے دونوں ملکوں کے درمیان تجارت، سلامتی اور دفاعی تعاون بڑھانے کی ضرورت پر زور دیا۔انہوں نے کہا کہ پاکستان اور امارات کے تاریخی تعلقات باہمی اعتماد ،مشترکہ امن اور خوشحالی کے جذبے پر قائم ہیں ۔
صدرمملکت نے چاروں ملکوں کے سفراء کے لیے نیک خواہشات کا اظہار کرتے ہوئے امید ظاہر کی کہ ان کی تعیناتی سے دو طرفہ اور کثیرالجہتی تعاون مضبوط ہوگا
DATE . Nov/18/2025
