وزیراعظم سے سکھ تنظیم کے صدر جسدیپ سنگھ کی ملاقات، پاکستان آنے والے سکھ یاتریوں کیلئے مزید سہولیات دینے کا عزم

اسلام آباد:وزیراعظم محمد شہباز شریف نے کہاہے کہ ہم پاکستان آنے والے سکھ برادری کو ہر ممکن سہولیات فراہم کرنے کے لئے کوشاں ہیں ۔ ان خیالات کااظہار وزیراعظم نے امریکہ میں مقیم سکھ برادری کی تنظیم کے صدر جسدیپ سنگھ سے ملاقات کے دوران کیا۔

امریکہ میں مقیم سکھ برادری کی تنظیم کے صدر جسدیپ سنگھ نے آج وزیراعظم محمد شہباز شریف سے ملاقات کی ۔ملاقات میں وفاقی وزیر قانون و انصاف اعظم نذیر تارڑ اور پاکستانی نژاد امریکی کاروباری شخصیت ساجد تارڑ بھی موجود تھے۔

وزیراعظم نے پاکستان آمد پر جسدیپ سنگھ کو خوش آمدیدکہتے ہوئے کہا کہ پاکستان میں سکھوں کے بہت سے مقدس مذہبی مقامات موجود ہیں جہاں پر دنیا بھر سے سکھ برادری کے افراد مذہبی رسومات کی ادائیگی کے لئے آتے ہیں اور پاکستان انکی مہمان نوازی کرتا ہے ۔

وزیراعظم نے مزید کہا کہ ہم پاکستان آنے والے سکھ برادری کو ہر ممکن سہولیات فراہم کرنے کے لئے کوشاں ہیں ۔یہ ہمارے لئے فخر کا باعث ہے کہ پاکستان سکھ برادری کے مقدس مقامات اور گردواروں کی دیکھ بھال اور یہاں ہر ممکن سہولیات کی فراہمی کو یقینی بنا رہے ہیں۔ہم پاکستان میں مقیم سکھ برادری کی فلاح و بہبود اور دنیا بھر سے سکھ یاتریوں کو مزید سہولیات کی فراہمی کے حوالے سے حکمت عملی ترتیب دیں گے ۔

سمندر پار پاکستانیوں کا ذکر کرتے ہوئے وزیر اعظم نے کہا کہ بیرون ملک پاکستانی ملک کی ترقی و خوشحالی اور اس کا نام روشن کرنے کے حوالے سے اہم کردار ادا کر رہے ہیں۔

ملاقات کے دوران جسدیپ سنگھ نے پاکستان میں ان کی میزبانی اور سکھ یاتریوں کی مہمان نوازی پر وزیر اعظم اور حکومت پاکستان کا شکریہ ادا کیا۔

DATE . Nov/19/2025