لاہور:وزیراعلیٰ پنجاب مریم نواز شریف نے بچوں کے جنسی استحصال، بدسلوکی اور تشدد کی روک تھام و بحالی کے عالمی دن پر اپنے پیغام میں کہا ہے کہ بچوں کے ساتھ جنسی استحصال، بدسلوکی اور تشدد صرف جرم نہیں بلکہ انسانیت کے خلاف بغاوت ہے۔ انہوں نے کہا کہ بچے ان کی ریڈ لائن ہیں، سب ہی پیارے ہیں اور سب کی حفاظت حکومت کی ذمہ داری ہے۔
وزیراعلیٰ نے کہا کہ بچوں کے خلاف جرائم میں ملوث افراد سماج کے ناسور ہیں اور پنجاب سے انہیں جڑ سے اکھاڑ پھینکا جائے گا۔ انہوں نے بتایا کہ پنجاب میں بچوں کو تحفظ دینے کے لیے پاکستان کا پہلا ورچوئل سینٹر برائے چائلڈ سیفٹی قائم کیا گیا ہے، جہاں ڈیجیٹل ٹیکنالوجی اور مستحکم گورننس کو ملا کر بچوں اور شہریوں کی حفاظت کا جدید نظام تشکیل دیا گیا ہے۔
مریم نواز شریف نے کہا کہ پنجاب کا ورچوئل سینٹر برائے چائلڈ سیفٹی ہزاروں بچھڑے ہوئے بچوں اور بزرگوں کو ان کی فیملیز سے ملا چکا ہے۔ انہوں نے ہدایت کی کہ پنجاب میں کسی بچے کے لاپتہ ہونے کی صورت میں فوری طور پر ورچوئل سینٹر برائے چائلڈ سیفٹی سے رابطہ کیا جائے۔
DATE . Nov/19/2025
