لاہور: وزیراعلیٰ پنجاب مریم نواز شریف نے ورلڈ چِلڈرن ڈے کے موقع پر اپنے خصوصی پیغام میں کہا ہے کہ میرے پاکستان کا ہر بچہ لختِ جگر ہے اور اپنی اولاد کی طرح میرا مستقبل، میری ذمہ داری اور میری اولین ترجیح ہے۔ انہوں نے پنجاب کے تمام بچوں کو محبت، دعاؤں اور رحمتوں سے بھرپور سلام پیش کرتے ہوئے کہا کہ جہاں بچے محفوظ ہوں وہاں مستقبل ہمیشہ روشن ہوتا ہے۔
وزیراعلیٰ مریم نواز نے کہا کہ پنجاب حکومت کا ہر قدم بچوں کی بھلائی، حفاظت اور خوشیوں کے لیے اٹھایا جا رہا ہے۔ انہوں نے بتایا کہ بچوں کی صحت اور اعلیٰ تعلیم حکومت کی پہلی ترجیح ہے، چائلڈرن ہارٹ سرجری پروگرام کے ذریعے ہزاروں بچوں کی زندگیاں بچائی گئی ہیں، جبکہ ٹائپ ون شوگر کے مریض بچوں کو انسولین کِٹس گھر گھر پہنچائی جا رہی ہیں۔
وزیراعلیٰ نے کہا کہ آٹسٹک بچوں کے لیے پاکستان کا پہلا خصوصی آٹزم اسکول قائم کردیا گیا ہے جس کا جلد افتتاح ہوگا، جبکہ ننھے بچوں کے لیے نواز شریف انسٹیٹیوٹ آف ارلی ایجوکیشن ہر ضلع میں قائم کیے جائیں گے۔ انہوں نے بتایا کہ ورچوئل سینٹر فار چائلڈ سیفٹی پروگرام کے تحت گمشدگی، استحصال اور خطرات کے کیسز جدید نظام کے تحت حل کیے جا رہے ہیں۔
مریم نواز شریف نے کہا کہ چائلڈ لیبر کے انسداد کے لیے سخت کریک ڈاؤن جاری ہے اور بچوں کے خلاف تشدد اور بھیانک جرائم کے خاتمے کو یقینی بنایا جا رہا ہے۔ غذائی قلت کے شکار بچوں کے لیے جنوبی پنجاب میں اسکول میل پروگرام شروع کیا گیا ہے تاکہ بھوک بچوں کی تعلیم کی راہ میں رکاوٹ نہ بنے۔ سرکاری اسکولوں کے طلباء کو تمام بنیادی سہولیات فراہم کی جا رہی ہیں جبکہ خصوصی بچوں کے لیے مصنوعی اعضاء، ہیرنگ ایڈز اور وہیل چیئرز بھی فراہم کی جا رہی ہیں۔
انہوں نے کہا کہ جب تک ہر بچے کی آنکھ میں خوبصورت مستقبل کی چمک نہیں آتی، جدوجہد مکمل نہیں ہوگی۔ وزیراعلیٰ نے کہا کہ پنجاب کا ہر بچہ پڑھے گا، صحت مند ہوگا، مسکرائے گا،کیونکہ ماں اپنے بچوں کو کبھی تنہا نہیں چھوڑتی۔
DATE . Nov/20/2025
