لاہور: وزیراعلیٰ پنجاب مریم نواز شریف سے فلپائن کے سفیر ڈاکٹر ایمینوئیل آر فرنینڈز نے ملاقات کی۔ ملاقات میں دوطرفہ تعلقات، سرمایہ کاری، موسمیاتی تبدیلی، دفاعی تعاون اور عوامی روابط پر تفصیلی تبادلہ خیال کیا گیا۔ گفتگو میں سیاسی، آئینی اور پارلیمانی تعاون کے مختلف پہلوؤں پر بھی بات چیت ہوئی۔
ملاقات میں فلپائن اور پنجاب کے درمیان اشتراک کار مزید مضبوط بنانے پر اتفاق کیا گیا۔ وزیراعلیٰ نے مریم نواز شریف فلپائن کو 2026 کی آسیان چیئرمین شپ کے لیے دلی مبارکباد پیش کی اور فلپائنی سرمایہ کاروں کو پنجاب میں سرمایہ کاری کی پیش کش کرتے ہوئے مکمل تعاون اور سہولیات کی یقین دہانی کرائی۔
وزیراعلیٰ مریم نواز شریف نے کہا کہ پاکستان اور فلپائن کے درمیان دوستی 76 برسوں پر محیط ایک مضبوط اور باوقار رشتہ ہے۔ لاہور اور پنجاب کی سرزمین ہمیشہ دوست ممالک کے لیے اپنے دروازے کھلے رکھتی ہے۔ انہوں نے کہا کہ پاکستان اور فلپائن کے درمیان روحانی و تہذیبی اقدار، امن، انسانیت اور ہم آہنگی ہمارا مشترکہ ورثہ ہیں، جبکہ 25 ایم او یوز اور 2022 کے دفاعی تعاون کا معاہدہ دوطرفہ تعلقات کو نئی جہت دے رہا ہے۔
وزیراعلیٰ نے فلپائن میں حالیہ زلزلوں اور طوفان سے انسانی جانوں کے ضیاع پر تعزیت کا اظہار کرتے ہوئے کہا کہ پاکستان دکھ کی اس گھڑی میں فلپائن کے عوام کے ساتھ کھڑا ہے۔ انہوں نے کہا کہ فلڈز اور ٹائفونز نے پاکستان اور فلپائن دونوں کو یکساں متاثر کیا ہے، جبکہ لوس اینڈ ڈیمج فنڈ کی تشکیل میں دونوں ممالک کا کردار قابلِ فخر ہے۔
انہوں نے کہا کہ فلپائن کی ڈیزاسٹر مینجمنٹ مہارت سے پنجاب ادارہ جاتی تبادلوں کے ذریعے استفادہ کرنا چاہتا ہے، اور پاکستان پائیدار امن اور ڈی ریڈیکلائزیشن اقدامات کی مکمل حمایت کرتا ہے۔
وزیراعلیٰ نے کہا کہ پنجاب پاکستان کی معاشی ریڑھ کی ہڈی ہے اور 60 فیصد قومی جی ڈی پی اسی صوبے سے بنتی ہے۔ آئی ٹی، توانائی، زرعت، فوڈ پروسیسنگ، فارماسیوٹیکل، آٹو پارٹس، لاجسٹکس اور کنسٹرکشن سیکٹر میں وسیع مواقع موجود ہیں۔ ایس آئی ایف سی اور پی بی آئی ٹی سرمایہ کاروں کو ون ونڈو سہولت اور پالیسی استحکام فراہم کر رہے ہیں جبکہ پنجاب کے اسپیشل اکنامک زونز میں عالمی معیار کا انفراسٹرکچر، ٹیکس مراعات اور کسٹمز سہولتیں میسر ہیں۔
انہوں نے کہا کہ پاکستان دفاعی تربیت، جوائنٹ مشقوں، انسدادِ دہشت گردی اور انٹیلیجنس شیئرنگ کے شعبوں میں مزید تعاون بڑھانے کے لیے تیار ہے۔ ہزاروں فلپائنی پاکستان میں اور بڑی تعداد میں پاکستانی فلپائن میں مقیم ہیں جو باہمی دوستی کو مضبوط بناتے ہیں۔
وزیراعلیٰ نے کہا کہ لاہور کا یونیسکو کرییٹیو سٹی اور ای سی او ٹورازم کیپیٹل 2027 کا اعزاز ثقافتی اور سیاحتی تعاون کے نئے دروازے کھولے گا۔ انہوں نے کہا کہ پاکستان اور فلپائن دوستی، اعتماد اور مشترکہ اقدار پر قائم رشتے کو مزید مضبوط بنانے کے لیے پُرعزم ہیں اور پنجاب ہر شعبے میں باہمی شراکت داری کو نئی بلندیوں تک لے جانے کے لیے پرعزم ہے۔
DATE . Nov/21/2025
