اشک آباد: وزیر اعظم نے اشک آباد میں امن و اعتماد کے بین الاقوامی سال کے لیے منعقدہ بین الاقوامی کانفرنس کے موقع پر جمہوریہ ترکیہ کے صدر رجب طیب ایردوان سے ملاقات کی۔ ملاقات میں دونوں رہنماؤں نے پاکستان اور ترکیہ کے درمیان تاریخی، گہرے اور برادرانہ تعلقات کی اہمیت پر زور دیا، جن کی بنیاد مشترکہ اقدار اور امن و خوشحالی کی متفقہ امیدوں پر قائم ہے۔
وزیر اعظم نے اس سال کے دوران پاکستان اور ترکیہ کی قیادت کے مابین مسلسل روابط پر اطمینان کا اظہار کیا اور کہا کہ پاکستان سیاسی، توانائی، اقتصادی، دفاعی اور سرمایہ کاری سمیت باہمی دلچسپی کے تمام شعبوں میں ترکیہ کے ساتھ تعاون مزید مضبوط بنانے کا خواہاں ہے۔ اس حوالے سے انہوں نے پاک ترک جے ایم سی کے 16ویں اجلاس کے انعقاد پر بھی خوشی کا اظہار کیا، جو ساتویں اعلیٰ سطحی اسٹریٹجک تعاون کونسل کے فیصلوں پر عمل درآمد کو یقینی بنائے گا۔
وزیر اعظم نے توانائی، پیٹرولیم اور معدنیات کے شعبوں میں ترکیہ کی بڑھتی ہوئی دلچسپی اور سرمایہ کاری کا خیرمقدم کیا۔ انہوں نے اہم شعبوں میں حال ہی میں طے پانے والی مفاہمتی یادداشتوں اور معاہدوں پر بروقت عمل درآمد کی ضرورت پر زور دیا۔ وزیر اعظم کا کہنا تھا کہ پاکستان بجلی کی تقسیم کار کمپنیوں کی نجکاری کے عمل میں ترکیہ کے تجربے سے فائدہ اٹھانا چاہتا ہے، جس کے لیے دونوں ممالک کے درمیان وزارتی سطح پر جلد تبادلوں پر اتفاق کیا گیا۔
انہوں نے علاقائی روابط کی اہمیت کو بھی اجاگر کیا، جس میں اسلام آباد-تہران-استنبول ریل نیٹ ورک کی بحالی شامل ہے۔ ملاقات کے دوران دونوں رہنماؤں نے علاقائی اور عالمی امور پر بھی تبادلہ خیال کیا۔ وزیر اعظم نے صدر ایردوان کی جرات مندانہ قیادت، غزہ میں امن کے لیے ان کی کوششوں اور افغان طالبان کے ساتھ مذاکرات میں ترکیہ کے تعمیری کردار کو سراہا، تاہم واضح کیا کہ پاکستان میں پائیدار امن تب ہی ممکن ہے جب پاکستان کے سلامتی سے متعلق خدشات مکمل طور پر دور کیے جائیں۔
صدر رجب طیب ایردوان نے وزیر اعظم کی نیک تمناؤں کا شکریہ ادا کیا اور پاکستان کے ساتھ مضبوط تعلقات کو مزید فروغ دینے کی خواہش کا اظہار کیا
DATE . Dec/13/2025
